AED Bizkaia Emakume Enpresari eta Zuzendarien Elkarteak datorren apirilaren 21ean, 12:30etik 14:00etara, Enpresa Foro AED 2026ren edizio berri bat egingo du Bilboko Iberdrola Dorrean, honako izenburupean: “Diagnostikotik konpromisora: emakumeak enpresen zuzendaritzan”.

Topaketan, Emakumeak enpresen zuzendaritza-organoetan 2025eko egoerari buruzko azterlana aurkeztuko da, Emakume Enpresa Behatokiaren esparruan egina. Helburua izango da erabakiak hartzeko guneetan emakumeen presentziaren bilakaera aztertzea eta gobernantza-eredu inklusiboago baterantz aurrera egitea.

Jardunaldia Isabel Iturbe AED Bizkaiako presidenteak gidatuko du, eta hasiera instituzionala Ainara Basurko Bizkaiko Foru Aldundiko Ekonomia Sustatzeko diputatuak emango du.

Azterlanaren datu nagusiak aurkeztu ondoren, mahai-inguru bat egingo da, emakumeek Administrazio Kontseiluetan duten presentziaren eragina aztertzeko, baita enpresen zuzendaritzan berdintasunean aurrera egiteko dauden erronkak eta aukerak partekatzeko ere.

Saioa Marta Areizagak, AEDko presidenteorde eta Elkar-laneko zuzendariak, moderatuko du, eta honako hauek hartuko dute parte: Ainara Hernando (Abyntek Biopharma eta Hada Dermocosmetics enpresetako sortzaile eta CEOa), Begoña Castro (Histocell Regenerative Medicine enpresako Chief Scientific Officer) eta Asier Albizu (BIOLANeko zuzendari nagusia eta Basque Health Clusterreko presidentea).

Foroa amaitzeko, networking gune bat egongo da, parte-hartzaileen arteko harremanak eta elkarrizketa sustatzeko.